تولكو و حاجي لئيلك
گونلرين بير گونو بير حاجي لئيلك ايله بير تولكو قارداشليق ائديرديلر. اونلار بير يئرده چيخير، بير يئرده گزيرديلر. بير گون تولكو حاجي لئيله يه دئدي:
ـ قارداش، آخشام بيزه قوناق گلرسن؟
حاجي لئيلك او گون آخشامادك چؤرك يئمه دي، اؤزونو تولكونون قوناقليغينا ساخلادي. آخشام حاجي لئيلك قارداشليغي تولكونون ائوينه گلدي. تولكو دوردو بير قازان دووغا بيشيردي. بير بوشقابا تؤكدو، سوفره يه گتيردي. يئمه يه باشلاديلار. حاجي لئيلك هر دفعه ديمديييني اوزاداندا آنجاق بيرجه دويو گؤتوره بيليردي. او، بئش- آلتي دوگو گؤتورمه ميش تولكو دووغاني تامام يالاييب قورتاردي.
حاجي لئيلك آج قالدي. اؤز- اؤزونه دئدي: « ياخشي، آي تولكو، عوضيني سندن چيخارارام».
حاجي لئيلك او گئجه صاباحادك آجيندان ياتا بيلمه دي، قارنيني اوووشدورا- اوووشدورا قالدي.
بير نئچه گون كئچدي. بير گون حاجي لئيلك ده دووغا بيشيريب، قارداشليغي تولكونو قوناق چاغيردي. حاجي لئيلك دووغاني بير بارداغا تؤكوب سوفره يه قويدو. سونرا اوزو ديمديييني ساليب بارداقداكي دووغاني تامام ايچدي، تولكو آنجاق بارداغين قيراغينا تؤكولنلري يالادي. او، گئجه آج- آجينا ياتدي. سحر تئزدن دئيينه- دئيينه اؤز ائوينه گليب دئدي: «سندن منه قارداش اولماز، من سني يئييم، سنده تاماشا ائله».
بير موددت كئچدي. تولكو اوره ييندن آجيغيني چيخارتمادي. بير سحر تئزدن تولكو، حاجي لئيله يين يانينا گليب دئدي:
ـ قارداش، اوره ييم برك داريخير، دور گئدك ياشيل چمنده بير آز گزك.
حاجي لئيلك راضي اولدو. هر ايكي سي بير- بيرينه قوشولوب، بير چمنه چاتدي. تولكو دئدي:
ـ قارداش، گل بو چمنده بير آز ياتاق.
ياشيل چمنده اوزانديلار. تولكو اؤزونو يالاندان يوخويا ووردو. حاجي لئيلك، يوخويا تزه جه گئتميشدي، تولكو بيردن يئردن قالخدي، حاجي لئيله يين بوغازيندان توتماق ايسته ينده، حاجي لئيلك اويانيب دئدي:
ـ قارداش نه ائله ييرسن؟
ـ تولكو دئدي: سني يوخودا گؤرموشدوم، اونا گؤره سني اؤپمك ايسته ديم.
حاجي لئيلك اونون حيله سيني باشا دوشدو. اؤز- اؤزونه دوشوندو.
ـ « ياخشي، گؤرك كيم كيمي اؤلدورر».
او، تولكويه دئدي:
ـ قارداش، داها ياتميرام، گل منيم قانادلاريمين اوستونه مين، هاوايا قالخاق، بير آزدا گؤيده گزك، سونرا گليب آرخايين ياتاريق.
تولكو حاجي لئيله گين قانادلارينين اوستونه ميندي. حاجي لئيلك هاوايا قالخدي. بير چوخ قالخاندان سونرا سوروشدو:
ـ قارداش نئجه گؤرونور؟
ـ خيرمان بويدا.
حاجي لئيلك بير آزدا قالخيب سوروشدو:
ـ قارداش ايندي نه جور گؤرونور؟
ـ تولكو دئدي:
ايندي هئچ گؤرونمور؟
ـ حاجي ائيلك دايانيب دئدي:
قارداش داها قانادلاريم آغرييير، دوش بير آز دينجه ليم.
تولكو يالواريب دئدي:
ـ آي قارداش باشينا دؤنوم، قوربانين اولوم، من نه تهر دوشوم؟ آماندي مني آشاغي ايندير.
حاجي لئيلك دئدي:
ـ قانادلاريم آغرييير، دوشمه سن سني يئره سالاجاغام.
تولكو چوخ يالواريب، ياخاردي، گؤزلرينين ياشيني تؤكدو، آمما حاجي لئيله يين اوره يي يومشالمادي. حاجي لئيلك اونو توللاييب دئدي:
ـ حيله چي تولكو، بو مني يوخودا اؤپدويونون عوضيدير.
تولكو يئره دوشوب، شيل- كوت اولدو. حاجي لئيلك ده بالالارينين يانينا گليب، كئف له گون كئچيردي.
................................................................................................................................
حاضيرلايان: حسين واحدي (قايناق:آذربايجان اوشاق ناغيل لاري/ معصومه اژدري)
ادامه مطلب
شنگولوم، شونگولوم، منگولوم
كؤچورون: محمدرضا خيري فام
بيري وارميش، بيري يوخموش، بير كئچي وارميش. كئچي نين اوچ بالاسي وارميش. بيرينين آدي شنگولوم، بيرينين آدي شونگولوم، او بيرينين ده آدي منگولوم. بو كئچي هر گون گئديب مئشه ده و چؤلده اوتلايار، گئري قاييداندا بوينوزوندا اوت، آغزيندا سو، دؤشلرينده سود گتيررميش. آستانادا دايانيب قاپيني دؤيرميش، شنگولوم، شونگولوم، منگولوم آتيلا-آتيلا، دينگيلده يه-دينگيلده يه قاپينين دالينا گليب سوروشارميش: -كيمدير؟
- شنگولوم، شونگولوم، منگولوم! آچين قاپيني، من گليم! آغزيمدا سو گتيرميشم، دؤشومده - سود گتيرميشم، بوينوزومدا اوت گتيرميشم. بالالار ائله بيلير كي، بونلاري چاغيران آنالاري دير. جلد قاپيني آچديلار. قورد او ساعات منگولومو يئدي، شنگولوم، شونگولومقاچيب گيزلنديلر. قورد چوخ آختاردي، اونلاري تاپمادي. كئچينين قورخوسوندان قاچيب گئتدي. ائله كي، قورد گئتدي، شنگولوم، شونگولوم گيزلنديكلري يئردن چيخيب قاپيني باغلاديلار. بير كونجه اوتوروب آغلاماغا باشلاديلار. آخشام دوشدو. كئچي اؤروشدن قاييديب قاپيني نه قدر دؤيدو، اونا جاواب وئرن اولمادي.
چپيشلر ائله بيلديلر كي، يئنه ده قورددور. اونا گؤره جاواب وئرمه ديلر. كئچي گئري چكيليب قاپييا بير بوينوز ايليشديردي. دالبادال بير بوينوز، ايكي بوينوز شنگولومله شونگولوم گؤردو كي، قاپيني سينديراجاق، گليب قولاق وئرديلر، بالاجا دئشيكدن باخديلار كي، آنالاريدير. قاپيني آچديلار.
كئچي اونلاردان سوروشدو: - بس، منگولوم هاني؟ اونلار باشلاديلار آغلاماغا. احوالاتي آنالارينا دانيشديلار. كئچي حيرصله نيب دئدي: -ياخشي، قوردلا منيمكي قالسين، سيز قاپيني باغلايين، ائوده اوتورون. بلي، كئچي دوشدو يولون آغزينا. آز گئتدي، چوخ گئتدي، گليب بير دامين اوستونه چيخدي. آياقلاريني يئره دؤيمه يه باشلادي. ايچريدن سس گلدي:-او كيمدي، دامين اوسته. تاپپير-توپپور دؤيور آياغين دامين اوسته.كئچي دئدي: -بالامي سن يئميسن؟ تولكو دئدي: -يوخ، من يئمه ميشم، گئت قورددان سوروش. كئچي اوردان دميرچينين يانينا گليب دئدي: -دميرچي قارداش، منيم بوينوزلاريمي قيلينج كيمي ايتي ائله، نيزه كيمي شيش. سنه بير كاسا قايماق، بير كاسا دا سود وئره جه يم. دميرچي راضي اولدو. بير آزدان كئچي نين بوينوزلاري قيلينجدان دا ايتي اولدو. كئچي اونون قايماغيني، سودونو وئردي. كئچي گئتدي چيخدي قوردون دامينين اوستونه. بو واخت قورد دا بير قازان آش آسميشدي، اوجاغين اوسته بيشيريردي. كئچي دامي دؤينده بونون آشينين ايچينه تورپاق تؤكولدو. اوندا قورد چاغيردي: -او كيمدير داميم اوسته، توز تؤكر شاميم اوسته؟ آشيمي شور ائيله دي، گؤزومو كور ائيله دي؟كئچي جاواب وئردي: منم، منم، جاناوار بوينوزوم قوشا-قوشا. بالامي سن يئميسن گل گيرك بير ساواشا. قورد جاواب وئردي: -چوخ گؤزل، گل ساواشا، ائله من سني آختاريرديم. قورد سؤزونو تامام ائله دي. ديشلريني قيچيرتدي، ايسته دي كئچيني يئسين. كئچي اونا آمان وئرمه دي. گئري چكيليب ايره لي گلدي، اونا ائله بير بوينوز ووردو كي، بوينوزلار ايكي قاريش اونون دؤشونه ايشله دي. قورد بركدن اولاييب يئره ييخيلدي. كئچي او ساعات اونون قارنيني ييرتيب منگولومو چيخارتدي، باغرينا باسدي، گؤزلريندن اؤپدو. قورد قيشقيريب دئدي: -واي قارنيم، واي. كئچي دئدي: -منگولومو يئمييدين! واي قورساغيم دئمييدين! خاين قورد اؤلدو. كئچي بالاسي منگولومو گؤتوروب ائوه يوللاندي. شنگولوم، شونگولوم منگولومو گؤرنده چوخ سئوينديلر. اونون اوزوندن-گؤزوندن اؤپدولر، شادليق ائله ديلر.
.......................................................................................................................................................................
منيم اوشاقليق دؤنمينده ائشيتدييم واريانت بير آز بوندان چئشيدلي دير. اؤرنه يين سون بؤلومده قورد دئيير:
- او كيمدي تاپ- تاپ ائليير خميريمي تورپاغ ائليير؟
كئچي دئيير:
منم منم ملهجه بوينوزلاريم كلفچه. هر كس منيم بالامي يئييب گلسين كئدك معريكييه!
ادامه مطلب
لايلالار
اوزاق ايللردن بري، آنالار اوشاقلارينا اولان سونسوز سئوگيلريني لايلالار قاليبينده كؤرپه لرينه سؤيله ميشلر. يوخ اولماق تهلوكه سينده اولان بو لايلالاري ياشاتماق بيزيم بورجوموزدور.
سونسوز فولكلور خزينه ميزدن اولان بو گؤزل لايلالار كيچيجيك" آيهانا"سونولور.
لايلاي دئديم بويونجا ،
باش ياستيغا قويونجا ،
يات ، گولوم ، ياتاغيندا ،
باخيم سنه دويونجا
.
لايلاي دئديم آغلاما،
اورييمي داغلاما،
بؤيو بير قوچ ايگيد اول،
منه اوميد باغلاما
.
لايلاي دئديم، جان دئديم،
يوخودان اويان دئديم،
سنه يوخودان دورونجا
جانيمي قوربان دئديم
.
نار بوداغين اينده ،
اوجو يئره دينده
.بير قوچ قوربان كسه جم
بالام « آنا» دئينده
.
اوخشاسين ديليم سني ،
بؤيوتسون ائليم سني ،
مئيداندا آت اوينادان
بيرايگيد بيليم سني
.
لايلاي ، بئشيييم ، لايلاي ،
ائويم، ائشيييم، لايلاي،
سن يات شيرين يوخودا ،
چكيم كئشييين، لايلاي
.
لايلاي دئديم، ياتاسان،
قيزيل گوله باتاسان،
قيزيل گولون ايچينده
شيرين يوخو تاپاسان
قايناق:damlalar.blogfa.com
ادامه مطلب
بلاقا گؤره
